முஹம்மட் ஹாசில்

அண்மையில் வெளியான 2023ஆம் ஆண்டுக்கான தரம் 5 புலமைப்பரிசில் பரீட்சை பெறுபேறுகளின் படி கெப்பித்திகொள்ளவ கல்வி வலயத்திற்குட்பட்ட அங்குநொச்சிய, அல்மாஸ் மகா வித்தியாலயத்திலிருந்து பரீட்சைக்கு தோற்றியவர்களுள் 11 மாணவர்கள் வெட்டுப்புள்ளிகளுக்கு மேல் பெற்று சித்தியடைந்துள்ளதாக பாடசாலை அதிபர் ஏ.எம் இஷாக் தெரிவித்துள்ளார்.

வெட்டுப் புள்ளிகளுக்கு மேல் பெற்ற மாணவர்களின் எண்ணிக்கை அடிப்படையில் அல்மாஸ் மஹா வித்தியாலயம் கெப்பித்திகொள்ளாவ கல்வி வலயத்தில் தமிழ் மொழி மூல பாடசாலைகளில் முதலாம் இடத்தையும், அனுராதபுர மாவட்டத்தில் தமிழ் மொழி மூல பாடசாலைகளில் இரண்டாம் இடத்தையும் பெற்றுள்ளதாகவும் பாடசாலையின் அதிபர் மேலும் தெரிவித்துள்ளார்.

அத்துடன் கடந்த பல ஆண்டுகளாக இப்பாடசாலை மாணவர்கள் பல சாதனையை நிலை நிறுத்தி வருவதாகவும் இம்முறை இச்சாதனைகளுக்காக தம்மை அர்ப்பணித்து செயலாற்றிய பாடசாலையின் முன்னாள் அதிபர் ஏ.ஜ.எம் தௌபீக், பொறுப்பாசிரியர்களான ஏ.ஆர் யாசீர், எம். பெனோரிஷா, பாடசாலை அபிவிருத்திக்குழு, பழைய மாணவர் அமைப்பு மற்றும் நலன் விரும்பிகள், கல்வித்துறை சார் அதிகாரிகள் அனைவருக்கும் பாடசாலை அதிபர் ஏ.எம்.இஷாக் தனது நன்றிகளை தெரிவித்துள்ளார்.

அதனடிப்படையில் சித்தியடைந்த மாணவர்கள் வருமாறு; என்.ஹுஸ்னா (170), ஆர். ரிப்தா (165) எம்.எம்.ஏ முயீஸ் (163) ஏ.எச். அன்ஹா (152), ஆர்.எம் ஹஸ்ஸான் (151), ஏ.எஸ் ஹுசைன் (149), எம்.ஆர் ராசிக் (148), எம்.ஆர் ருகையா (148), எம் .எம் முபீத் (147), எம்.ஜே.எம் ருஸ்தி (146), ஏ.எப் அஸ்ரா (143)

 இலங்கையில் பொருளாதார நெருக்கடி ஏற்பட்டிருந்தபோது எமது அண்டை நாடான இந்தியா தான் முதலில் உதவியது. ஆனால் நன்றி கெட்ட தனமாக இந்திய அணியின் தோல்வியை இங்கு சிலர் பட்டாசு கொளுத்தி கொண்டாடுகின்றனர் என்று கல்வி ராஜாங்க அமைச்சர் அருணாச்சலம் அரவிந்தகுமார் தெரிவித்தார்.

இது தொடர்பில் அவர் மேலும் கூறியவை வருமாறு

விளையாட்டுப் போட்டி ஒன்றில் வெற்றி தோல்வி என்பது சாதாரண விடயம். அந்த வகையில் கிரிக்கெட் உலகக் கின்ன போட்டியில் இறுதி ஆட்டத்தில் ஆஸ்திரேலியா அணி வெற்றி பெற்றுள்ளது. 

இதனை அடுத்து இலங்கையில் சில பகுதிகளில் பட்டாசு கொளுத்தி மகிழ்ச்சியை வெளிப்படுத்தியுள்ளனர். 

ஆஸ்திரேலியா வென்றுவிட்டது என்பதை விடவும் இந்திய அணி தோல்வி அடைந்து விட்டது என்பதையே அவர்கள் கொண்டாடியுள்ளனர். இதனை ஏற்றுக் கொள்ள முடியாது.

பொருளாதார நெருக்கடியின் போது இந்தியா உதவியிருக்காவிட்டால் இலங்கை என்று சோமாலியா என்ற நிலையில் தான் இருந்திருக்கும். பட்டாசு கொளுத்தி மகிழ்ச்சியை வெளிப்படுத்துவதற்கான சூழ்நிலையும் இருந்திருக்காது. 

ஆகவே நன்றி கெட்டத்தனமாக இந்தியாவின் தோல்வியை கொண்டாடுவது ஏற்புடைய நடவடிக்கை அல்ல. என்றார் கல்வி ராஜாங்க அமைச்சர் அரவிந்த குமார்.

 “நாங்கள் முடிந்தவரை முயற்சித்தோம். ஆனால் ஆட்டத்தின் முடிவு நமக்கு சாதகமாக அமையவில்லை"என இந்திய அணியின் கேப்டன் ரோஹித் சர்மா தெரிவித்தார்.

உலகக்கோப்பை கிரிக்கெட் தொடரில் நேற்று நடைபெற்ற இறுதியாட்டத்தில் இந்திய அணியை 6 விக்கெட் வித்தியாசத்தில் வீழ்த்தி ஆஸ்திரேலியா 6 ஆவது முறையாக கோப்பையை வென்றது. உலகக்கோப்பை கிரிக்கெட் தொடர் முழுவதும் வீறுநடை போட்டு வந்த இந்திய அணி, இறுதிப்போட்டியில் ஆஸ்திரேலிய அணியிடம் எளிதில் தோல்விய தழுவியது.

இந்நிலையில் இந்திய அணியின் அதிர்ச்சி தோல்விக்கான காரணங்கள் குறித்து அணியின் கேப்டன் ரோஹித் சர்மா அளித்த பேட்டியில், “இறுதிப்போட்டி முடிவு எங்களுக்கு சாதகமாக இல்லை. நாங்கள் சிறப்பாக செயல்படவில்லை. நாங்கள் எல்லாவற்றையும் முயற்சி செய்தோம். எதுவும் சாதகமாக அமையவில்லை. குறிப்பாக கோலியும் ராகுலும் நன்றாக ஆடினார்கள். மற்ற பேட்ஸ்மேன்கள் ரன் சேர்க்க தவறினர். ஆஸ்திரேலிய அணியின் பந்துவீச்சு சிறப்பாக அமைந்தது.” என்றார்.

தொடர்ந்து பேசுகையில்,  “பேட்டிங்கின் போது ரன் குவிக்க தவறினோம். குறிப்பாக, நாங்கள் 270 முதல் 280 ரன்கள் வரை அடிப்போம் என  எதிர்பார்த்தோம். நிச்சயமாக இன்னும் 20-30 ரன்களை அதிகமாக அடித்திருக்க வேண்டும். 240 ரன்கள் மட்டும் எடுத்திருக்கும்போது, விக்கெட்டுகளை வேகமாக எடுக்க வேண்டும். அதை எங்களால் செய்ய முடியவில்லை. அதேபோல இரவு நேரத்தில் மின் ஒளிக்கு கீழ் விளையாடும் போது விக்கெட் பேட் செய்ய சிறப்பானதாக இருந்தது என்பதை உணர்ந்தேன். அதை காரணமாக சொல்லி தப்பிக்க விரும்பவில்லை. ” என்றார்.

“அதேநேரம் ஹெட்டும் லபுஷேனும் சிறப்பாக ஆடினார்கள். எங்களை ஆட்டத்திலிருந்து வெளியேற்றிவிட்டார்கள். பிட்ச்சின் தன்மை காரணமாக இரண்டாம் இன்னிங்ஸில் பேட்டிங் ஆடுவதற்கு சுலபமாக இருந்தது. ஆனால், தோல்விக்கு எந்த காரணத்தையும் சொல்லி தப்பிக்க நாங்கள் விரும்பவில்லை. நாங்கள் போதுமான ரன்களை அடிக்கவில்லை. அதுவே தோல்விக்கு முக்கிய காரணம், அவ்வளவுதான்” என்று அவர் தெரிவித்தார்.

தமிழ் மக்களின் பாரம்பரியமும், கலைநயமும் மிக்க பரதத்தை ஆண்களை மகிழ்விக்கும் விதமாகவே பரதநாட்டியம் ஆடப்படுவதாகவும், விலைமாதுக்கள் ஆடும் நடனமாகவும் கொச்சையான வார்த்தைகளை கொண்டு ஒழுக்கங்கள் இன்றி கடும்போக்காக அப்துல் ஹமீட் ஸராயி மௌலவி அவர்கள் பேசியிருக்கும் அந்த விடயங்களை நான் வன்மையாக கண்டிக்கிறேன் என ஜனாதிபதி செயலணியின் முன்னாள் உறுப்பினரும், கொழும்பு மாநகர சபையின் முன்னாள் உறுப்பினருமான ஐ.ஏ. கலிலூர் ரஹ்மான் தெரிவித்துள்ளார். 

அவர் வெளியிட்டுள்ள அறிக்கையில் மேலும், 

இஸ்லாமியர்களினால் பல நூற்றாண்டுகளாக கடைபிடித்துவந்த பாரம்பரியமிக்க கலாச்சார, கலை, இலக்கிய மரபுகளை பிழைகண்டு அவற்றுக்கு எதிராக பேசி ஒழித்துக்கட்டி பாடசாலைகளில் சினிமா திரைப்படங்களின் குத்துப்பாடல்களை ஒலிபரப்பிக்கொண்டு பாடசாலை விசேட தினங்களில் ஆசிரியர்கள் நடனமாட இப்படியான உலமாக்களே கடந்த காலங்களில் காரணமாக அமைத்துள்ளார்கள். இதனால் எது எமது கலாச்சாரம் எது அந்நிய கலாச்சாரம் என்று அடையாளம் தெரியாமல் தமது ரசனைக்கு விருந்தானவற்றை செய்து ஆசிரியர்கள் மாணவர்களை மகிழ்வித்து கொண்டிருக்கிறார்கள். 

ஆசிரியர்களும் மாணவர்களுக்கு ஒழுக்கமான விடயங்களை போதிக்காமல் இப்படி பாடல்களை ஒலிபரப்பிக்கொண்டு ஆடியது கண்டிக்கத்தக்கது. இந்த சினிமா பாடல்களுக்கான நடனங்களை தமிழர்களின் பாரம்பரியமிக்க பாரத நாட்டியமாக விடயம் தெரியாமல் அப்துல் ஹமீட் ஸராயி மௌலவி பேசியிருக்கிறார். எதையோ பற்றி பேசவேண்டி விளைந்து ஹிந்துக்களின் மனதை புண்படுத்தும் விதமாக பரதநாட்டியத்தை ஆண்களுக்கு உணர்வை தூண்டும் நடனமாக பேசியுள்ளார். இந்த விடயமாக இலங்கை பொலிஸ் திணைக்களத்தில் முறைப்பாடுகள் செய்யபப்ட்டுள்ளது. இது விடயமாக பொலிஸார் சுயாதீன விசாரணை செய்து குறித்த உலமாவுக்கு எதிராக சட்டநடவடிக்கை எடுக்க வேண்டும் என்று கேட்டுக்கொள்கிறேன். 

இவ்வாறான உலமாக்களை பாடசாலைகள், பல்கலைக்கழகங்கள், ஊடகங்கள், மதரஸாக்கள் போன்றவற்றில் மார்க்க பிரச்சாரம் செய்ய அல்லது கற்பித்தல் நடவடிக்கையில் ஈடுபட கல்வி அமைச்சு, புத்தசாசன அமைச்சு, வெகுசன ஊடக அமைச்சு போன்றன நடவடிக்கை எடுக்கவேண்டும். மன்னிப்பு கேட்பதாக அவர் வெளியிட்ட காணொளியில் கூட அவர் தொடர்ந்து அந்த கருத்தை வலியுறுத்தியுள்ளார். தெரியாமல் செய்த குற்றங்களுக்கு மன்னிப்பு வழங்குவதற்கும் விடயமறிந்தவர்கள் செய்யும் தவறுக்கு மன்னிப்பு வழங்குவதற்கும் நிறையவே வித்தியாசம் உண்டு. 

ஏனைய இனங்களின் மதகுருக்கள் எமது மார்க்கம் தொடர்பில் ஏதாவது பிழையான கருத்துக்களை முன்வைத்தால் கொதித்தெழும் இலங்கையின் உலமாக்கள், அரசியல் தலைவர்கள், சிவில் அமைப்புக்களின் தலைவர்கள், மத தலைவர்கள் இந்த விடயத்தில் மௌனம் காத்திருப்பது கவலையளிக்கிறது.

பிற சமூகங்களுடன் நல்லிணக்கமாக வாழ கற்றுத்தந்த மார்க்கத்தை பின்பன்றும் நாம் எமது சமூக உலமாக்கள் பிழை விட்டாலும் அதை சுட்டிக்காட்டவேண்டியது எமது கடமையாகவே உள்ளது. இதனை செய்யாது மௌனம் காப்பது ஏனைய சமூகங்கள் மத்தியில் முஸ்லிம்கள் தொடர்பில் பிழையான விம்பத்தை உருவாக்கும்.

இப்படியான மௌனமான போக்குகள் எதிர்காலத்தில் எமக்கு பாதகமான சூழ்நிலையை உருவாக்கும் இதனை தவிர்க்கும் வகையில் உலமாக்கள், அரசியல் தலைவர்கள், சிவில் அமைப்புக்களின் தலைவர்கள், மத தலைவர்கள் இந்த விடயத்தில் குரலெழுப்ப வேண்டும் என்றார்.

*நாட்டு மக்கள் நிம்மதியிழந்து இருக்கும் வேளையில் நாட்டை வங்குரோத்தடையச் செய்த ராஜபக்சக்களுடன் சேர்ந்து தற்போதைய ஜனாதிபதி கேக் வெட்டி கொண்டாடுகிறார்*.

எதிர்க்கட்சித் தலைவர் சஜித் பிரேமதாச

நாட்டு மக்கள் பட்டினியால் வாடும் நிலையில்,நாட்டின் தற்போதைய தலைவரும் முன்னாள் அரச தலைவரும் பெரிய கேக் வெட்டி பிறந்தநாளை கொண்டாடி வருகின்றனர் என்றும்,நாட்டு மக்களின் வாழ்க்கையை வெட்டித் தீர்த்த தலைவர்கள், தற்போதைய தலைவரின் உதவியால் சுகமான வாழ்க்கை வாழ்கிறார்கள் என்றும்,இது 2019 இல் எடுக்கப்பட்ட தவறான தீர்மானங்களின் விளைவு என்றும் எதிர்க்கட்சித் தலைவர் தெரிவித்தார்.

அரசியல் நண்பர்கள் ஒன்று கூடி தங்கள் குடும்பங்களின் குறைகளை நிவர்த்தி செய்து சுகபோக வாழ்க்கை வாழ்ந்தாலும்,நாட்டில் 220 இலட்சம் பேர் ஒரு நாளைக்கு 3 வேளை கூட சாப்பிட முடியாத நிலையில் உள்ளனர் என்றும்,

நாட்டு மக்கள் படும் துன்பங்கள் குறித்து இந்த

ஆட்சியாளர்களுக்கு அக்கறை இல்லை என்றும் எதிர்க்கட்சித் தலைவர் சஜித் பிரேமதாச தெரிவித்தார்.

பதுவத்துகொடை ஸ்ரீ சுனந்தாராம விகாரையில் இன்று(18) இடம்பெற்ற நிகழ்வொன்றில் கலந்து கொண்டு உரையாற்றும் போதே எதிர்க்கட்சித் தலைவர் மேற்கண்டவாறு தெரிவித்தார்.

*நாட்டை வங்குரோத்தாக்கியவர்களிடம் நஷ்ட ஈடு பெற நீதிமன்றத்திற்கு செல்லுங்கள்.சட்ட ஆதரவை நாம் வழங்குகிறோம்*.

இந்நாட்டை வங்குரோத்தாக்கிய பொருளாதாரக் கொலையாளிகள் உயர்  நீதிமன்றத்தின் முன் அம்பலமானார்கள் என்றும், நாட்டை வங்குரோத்தாக்கிய தரப்பினருக்கு எதிராக ஐக்கிய மக்கள் சக்தியின் புத்திஜீவுகள் பேரவையைப் பிரதிநிதித்துவப்படுத்தும் திறந்த பல்கலைக்கழகத்தின் மூன்று பேராசிரியர்கள் தாக்கல் செய்த மனுவை உயர்நீதிமன்றம் பரிசீலித்து மனுதாரர்களின் அடிப்படை உரிமைகள் கடந்த அரசாங்கத்தின் ஆட்சியாளர்களால் மீறப்பட்டுள்ளன என்று தீர்ப்பளித்துள்ளதாகவும்,இந்த தீர்மானத்தின் மூலம் நாட்டில் உள்ள 220 இலட்சம் மக்களின் அடிப்படை உரிமைகள் மீறப்பட்டுள்ளதாகவும் எதிர்க்கட்சித் தலைவர் தெரிவித்தார்.

இந்தச் சட்ட நடைமுறையால், நாட்டின் 220 இலட்சம் மக்கள், நாடு வங்குரோத்தானதால் ஏற்பட்ட இழப்பு மற்றும் சேதங்களுக்கு இழப்பீடு கோரி சட்டத்தின் முன் செல்ல வழி திறக்கப்பட்டுள்ளதாகவும் ,இதற்குத் தேவையான சட்ட ஆதரவை வழங்கும் வேலைத்திட்டத்தை ஐக்கிய மக்கள் சக்தியும் ஐக்கிய மக்கள் கூட்டணியும் முன்னெடுக்கும் என்றும் எதிர்க்கட்சித் தலைவர் சஜித் பிரேமதாச தெரிவித்தார்.

இந்த மனு மூலம் இழப்பீடு கிடைக்காவிட்டாலும்,நாட்டிலுள்ள 220 இலட்சம் பேருக்கு இழப்பீடு கிடைக்க ஐக்கிய மக்கள் சக்திக்கு உறுதுணையாக இருக்கும் என்றும் அவர் மேலும் தெரிவித்தார்.

ஏறாவூர் நகர் பிரதேச செயலகத்தின் பதிவாளர் பிரிவு சேவைகள் முற்றாக முடங்கியுள்ளதாகவும், இது குறித்து பிரதமரும் பொதுநிர்வாக உள்நாட்டலுவல்கள் அமைச்சருமான தினேஷ் குணவர்த்தனவுக்கு எழுத்து மூலம் அறிவித்துள்ளதாகவும் கிழக்கு மாகாண முன்னாள் அமைச்சர் எம்.எஸ்.சுபைர் தெரிவித்துள்ளார்.

இது தொடர்பில் அவர் மேலும் தெரிவிக்கையில்...

இலங்கையில் உள்ள சகல பிரதேசங்களிலும் உள்ள பதிவாளர் பிரிவுகளில் பிறப்பு இறப்பு மற்றும் விவாக விவாகரத்து சான்றுதழ்களை விரைவாகவும் Online ஊடாகவும் வழங்கும் முறைமை ஏற்படுத்தப்பட்டு அந்த சேவை சிறந்த முறையில் நடைமுறைப்படுத்தப்பட்டு வருகிறது.

இருந்த போதிலும் ஏறாவூர் நகர் பிரதேச செயலகத்தில் சுமார் ஐந்து மாத காலமாக Local Government Wifi (LGN Wifi) செயலிழந்துள்ளதனால் பதிவாளர் பிரிவு சேவைகள் முற்றாக முடங்கியுள்ளது. இதே பிரச்சினை செங்கலடி பிரதேச செயலகத்திலும் ஏற்பட்டுள்ளதாக அறியக்கிடைத்துள்ளது. இதனால் அந்தப்பகுதி மக்கள் தங்களுக்கு தேவையான பிறப்பு, இறப்பு, விவாக, விவாகரத்து சான்றுதழ்களை பெற்றுக்கொள்வதில் பல்வேறு அசௌகரியங்களை எதிர்நோக்கி வருவதுடன் அங்கு சேவையினை பெறுவதற்காக செல்லும் மக்கள் தினமும் ஏமாற்றத்துடனே திரும்பிச் செல்கின்றனர்.

நாட்டில் ஏற்பட்டுள்ள பொருளாதார நெருக்கடியின் காரணமாக நாட்டு மக்கள் பல்வேறு கஷ்டங்களை எதிர்நோக்கி வரும் நிலையில் வேலையற்ற இளைஞர்கள் தொழிலுக்காக வெளிநாடு செல்லுகின்ற நிலை அதிகரித்து வரும் இக்காலகட்டத்திலும் தங்களுக்கு தேவையான கடவுச்சீட்டு மற்றும் அடையாள அட்டைகளை பெற்றுக் கொள்வதற்காக பிறப்பு அத்தாட்சி பத்திரங்கள் பெற்றுக்கொள்வதில் காலதாமதம் ஏற்படுவதாகவும் பல்வேறு கஷ்டங்களை எதிர்நோக்கி வருவதாகவும் தெரிவிக்கின்றனர்.

இவ்வாறான நிலையில் குறித்த பிரதேச மக்கள் மட்டக்களப்பு கச்சேரிக்கு சென்று தங்களது பதிவு பிரதிகளை எடுக்க வேண்டியதொரு துர்ப்பாக்கிய நிலைக்கு தள்ளப்பட்டுள்ளதுடன் இதற்காக அதிகமான நிதிகளை செலவழித்து வருவதுடன் நீண்ட நேரம் காத்திருந்து குறித்த சேவையினை பெற்றுக்கொள்ள வேண்டியதொரு நிலைக்கும் தள்ளப்பட்டுள்ளனர்.

இந்த விடயமாக மட்டக்களப்பு மாவட்ட அரசாங்க அதிபர் மற்றும் கிழக்கு மாகாண ஆளுநரின் கவனத்திற்கு கொண்டு சென்ற போதும் இதுவரையில் எவ்விதமான முன்னேற்றகரமான நடவடிக்கைகளும் மேற்கொள்ளப்படவில்லை.

எனவே பொது நிர்வாக உள்நாட்டலுவல்கள் அமைச்சர் என்ற வகையில் பிரதமர் தினேஷ் குணவர்த்தனவுக்கு எழுத்து மூலம் அறிவித்துள்ளேன். குறித்த பிரதேச மக்களின் நலன் கருதி அந்த பிரதேச செயலகங்களில் வளமை போன்று பதிவாளர் பிரிவு இயங்க வேண்டும் என்பதுவே எமது எதிர்பார்ப்பாகும். அதற்குரிய நடவடிக்கைகளை மேற்கொண்டு வருகின்றேன் என்றார்.

குழந்தைகள் துஷ்பிரயோகம் அதிகரித்து வரும் நிலையில், அதனை தடுக்கும் வகையில் ஒரு குறிப்பிடத்தக்க நடவடிக்கையாக, பாடசாலைகளில் பாலியல் கல்விக்கான புதிய பாடத்திட்டத்தை அரசாங்கம் பரிசீலித்து வருகிறது.

இது தொடர்பான ஆரம்ப கலந்துரையாடல்கள் சிறுவர்களுக்கான பாராளுமன்றக் குழுவில் இடம்பெற்றதாக பாராளுமன்றத்தின் சிரேஷ்ட அதிகாரி ஒருவர் தெரிவித்துள்ளார்.

அதிகாரியின் கூற்றுப்படி, பாலர் பாடசாலை முதல் வெவ்வேறு வயதினருக்கான பாடத்திட்டம் குறிப்பாக வடிவமைக்கப்பட்டுள்ளது, இது குழந்தைகளுக்கு சரியான அறிவு மற்றும் முக்கியமான தலைப்புகளைப் பற்றிய புரிதலை வழங்குவதை நோக்கமாகக் கொண்டுள்ளது.

விரிவான பாலியல் கல்வியின் அவசரத் தேவையை எடுத்துரைத்த பாராளுமன்ற சிறுவர் பேரவையின் தலைவர் பாராளுமன்ற உறுப்பினர் ரோஹினி குமாரி விஜேரத்ன, இந்தப் பிரதேசத்தில் சரியான கல்வியின்மையால் பல பிரச்சினைகள் ஏற்பட்டுள்ளதாக வலியுறுத்தினார்.

புதிய பாடத்திட்டத்தை அறிமுகப்படுத்துவதன் மூலம், குழந்தைகளுக்கு அவர்களின் சொந்த பாலியல் ஆரோக்கியம் மற்றும் விழிப்புணர்வை வழங்குவதற்கு அதிகாரிகள் நம்புகின்றனர்.

புதிய பாலினக் கல்வி பாடத்திட்டத்தின் அறிமுகம் குழந்தைகளைப் பாதுகாப்பதிலும் அவர்களின் நல்வாழ்வை மேம்படுத்துவதிலும் ஒரு கூட்டு அர்ப்பணிப்பை நிரூபிக்கிறது. சிறுவர் பாதுகாப்புக்கு இலங்கை தொடர்ந்து முன்னுரிமை அளித்து வரும் நிலையில், இந்த முயற்சிகள் சிறுவர் துஷ்பிரயோகம் தொடர்பான அழுத்தமான பிரச்சினையை கையாள்வதில் குறிப்பிடத்தக்க முன்னோக்கினைக் குறிக்கின்றன.

புத்தளம் மாவட்ட பாராளுமன்ற உறுப்பினர் அலி சப்ரி ரஹீம் மீதான ஒழுக்காற்று நடவடிக்கை சம்பந்தமாக விளக்கமளிக்கும் நோக்கில் அகில இலங்கை மக்கள் காங்கிரஸ் நேற்று மாலை (16) ஊடக சந்திப்பொன்றை நடத்தியிருந்தது. அதன்போது அக்கட்சியின் தலைவர் பாராளுமன்ற உறுப்பினர் ரிஷாத் பதியுத்தீன் அவர்களால் முன்வைக்கப்பட்ட சில கருத்துக்கள் தொடர்பில் விளக்கமளிக்க ஐக்கிய தேசிய கூட்டமைப்பின் செயலாளர் நாயகம் என்ற வகையில் நான் நிர்பந்திக்கப்பட்டுள்ளேன். 

2020ம் ஆண்டு பொதுத் தேர்தலின் போது புத்தளம் மாவட்டத்துக்கான முஸ்லிம் பாராளுமன்ற உறுப்பினர் ஒருவரை பெற்றுக் கொள்ளும் நோக்கில் ஸ்ரீ லங்கா முஸ்லிம் காங்கிரஸ், அகில இலங்கை மக்கள் காங்கிரஸ் ஆகிய கட்சிகளும் எமது கட்சியான முஸ்லிம் தேசியக் கூட்டமைப்பின் (தற்போதைய ஐக்கிய தேசிய கூட்டமைப்பு) தராசு சின்னத்தில் வேட்பாளர்களை நிறுத்தி ஒரு கூட்டணியாக போட்டியிட்டது. அம் முயற்சியின் பயனாக மூன்;று தசாப்தங்களுக்கும் மேலாக புத்தளம் மாவட்டம் இழந்திருந்த முஸ்லிம் பாராளுமன்ற உறுப்பினர் பதவியை வென்று கொள்ள முடிந்தமையும், அகில இலங்கை மக்கள் காங்கிரஸ் சார்பில் போட்டியிட்ட அலி சப்ரி ரஹீம் அதிகூடிய விருப்பு வாக்குகiளை பெற்று பாராளுமன்ற உறுப்பினராக தெரிவு செய்யப்பட்டிருதார் என்பதும்  அனைவரும் அறிந்ததே. 

தேர்தல் முடிந்து இரண்டு மாதங்களுக்குள் அன்றைய ஆட்சியாளர்களால் கொண்டுவரப்பட்ட அரசியலமைப்பின் 20வது திருத்தச் சட்டமூலத்துக்கான வாக்கெடுப்பு நடைபெற்றது. கோவிட்19 நோய்த் தொற்றின் காரணமாக உயிரிழந்த முஸ்லிம் ஜனாசாக்களை தயவு தாட்சண்யம் இன்றி தகனம் செய்யப்படுவதற்கு எதிராக நாட்டில் வாழும் அனைத்து முஸ்லிம்களும் அன்றைய அரசாங்கத்துக்கு பலத்த கண்டனங்களை தெரிவித்துக் கொண்டிருந்த வேளையிலும் அவர்களால் கொண்டுவரப்பட்ட சர்ச்சைக்குரிய 20வது திருத்தத்துக்கு ஆதரவாகவும் தனது கட்சியின் தீர்மானத்துக்கு எதிராகவும் குறித்த பாராளுமன்ற உறுப்பினர் வாக்களித்திருந்தார். அவ்வாறு செயற்பட்ட அப் பாராளுமன்ற உறுப்பினருக்கு எதிராக ஒழுக்காற்று நடவடிக்கை மேற்கொள்ளப்பட வேண்டும் என முழு முஸ்லிம் சமூகமும் பலத்த எதிரபார்ப்புடன் இருந்தது. 

ஆனால், அகில இலங்கை மக்கள் காங்கிரஸ் தனது கட்சியின் அம்பாறை மாவட்ட பாராளுமன்ற உறுப்பினருக்கு எதிராக மேற்கொண்டதை போன்ற முறையான ஒழுக்காற்று நடவடிக்கைகள் எதனையும் தமது புத்தளம் மாவட்ட பாராளுமன்ற உறுப்பினர் மீது மேற்கொள்ள தவறியிருந்தது.. அவ்வாறு நடவடிக்கை மேற்கொள்ளப்பட்டு அவர் பாராளுமன்ற உறுப்பினர் பதவியை இழந்து விட்டால் இரண்டாவது அதிகூடிய விருப்பு வாக்குகளை பெற்றிருந்த ஸ்ரீலங்கா முஸ்லிம் காங்கிரஸ் வேட்பாளர் புத்தளம் நகர பிதா மர்ஹூம் கே.ஏ. பாயிஸ் பாராளுமன்ற உறுப்பினராக வந்து விடலாம் என்ற காரணத்தினால் அவர் மீது நடவடிக்கைகள் மேற்கொள்ளப் படாது தட்டிக் கழிக்க பட்டிருக்கலாம். ஆனால் இன்று தங்கம் கடத்தல் குற்றச்சாட்டின் பேரில் அவரை கட்சியிலிருந்து நீக்க அகில இலங்கை மக்கள் காங்கிரஸ் தீர்மானம் மேற்கொண்டுள்ளது. 

மேற்படி ஒழுக்காற்று நடவடிக்கைகளில் எந்த விதத்திலும் தொடர்பு படாத ஸ்ரீலங்கா முஸ்லிம் காங்கிரஸ் தலைவர் ரவூப் ஹக்கீமையும் அவர் சாடியுள்ளது மொட்டை தலைக்கும் முழங்காலுக்கும் முடிச்சுப் போடும் முயற்சியாகும். இதன்மூலம் தனது தனிப்பட்ட அரசியல் கோபதாபங்களையும் தீர்த்துக்கொள்ள முனைகிறார் என்பதனையே அவரது கருத்துக்களிலிருந்து புரிந்து கொள்ள முடிகிறது. 

2020 பொதுத் தேர்தலக்கான நியமனப் பத்திரங்கள் தாக்கல் செய்யும் இறுதி நாளுக்கு இரண்டொரு தினங்களுக்கு முன்னதாகத்தான் எமது கட்சியின் தராசு சின்னத்தின் கீழ் கூட்டணியாக போட்டியிடும் தீர்மானம் மேற்கொள்ளப்பட்டது. நியமனப் பத்திரத்தினை தாக்கல் செய்வதற்காக புத்தளம் செல்வதற்கு முன்தினம் அகில இலங்கை மக்கள் காங்கிரஸ் தலைவர் என்னை தொடர்பு கொண்டு எமது கட்சியுடன் ஒரு புரிந்துணர்வு உடன்படிக்கையை கைச்சாத்திட்டுக் கொள்ள வேண்டும் என கூறினார். அதன்படி அவர்களினாலேயே அவ்வுடன்படிக்கையும் தயாரிக்கப்பட்டிருந்தது. நான் அவர்களது காரியாலயத்துக்கு சென்று அதில் கையொப்பமிட்டேன். வெறுமனே இரண்டு பக்கங்களை கொண்டதும், வேட்பாளர்களது பெயர்கள் குறிப்பிடப்படாததுமான ஒரு உடன்படிக்கையையே அவர்கள் எனது கையொப்பத்துக்காக சமர்ப்பித்தார்கள். அந்த புரிந்துணர்வு உடன்படிக்கையை சரியான முறையில் தாயரித்து மீண்டும் அதில் கையொப்பமிட ஏற்பாடு செய்யுமாறு இரு வேறு சந்தர்ப்பங்களில் அக் கட்சியின் தலைவர் மற்றும் தவிசாளர் ஆகியோரிடம் நான் கேட்டுக்கொண்டேன். ஆனால் இன்றுவரை அவர்கள் அதனை பொருட்படுத்தாது காலம் கடத்திவிட்டு அவ் உடன்படிக்கையில் குறிப்பிடப்பட்டிராத சில விடயங்களை அதில் குறிப்பிடப்பட்டிருந்ததாக கூறி அவற்றை நான் மீறிவிட்டதாக நேற்றைய தினம் (16) என் மீது அபாண்டமாக குற்றம் சாட்டியுள்ளனர். 

அலி சப்ரி ரஹீம் பாராளுமன்ற உறுப்பினர் பதவியிலிருந்து நீக்கப்படும் பட்சத்தில் அவ்வெற்றிடத்தை நிறப்புவதற்காக அடுத்த நிலையிலுள்ள வேட்பாளர் ஸ்ரீலங்கா முஸ்லிம் காங்கிரஸ், அகில இலங்கை மக்கள் காங்கிரஸ் ஆகிய கட்சிகளைச் சாராத நேரடி ஐக்கிய தேசிய கூட்டமைப்பு  உறுப்பினராகவே கருதப்பட வேண்டியவராக இருந்தார். ஆனால், இவ்வருட ஆரம்பத்தில் உள்ளுராட்சி மன்ற தேர்தல்களுக்கான நியமனப்பத்திரங்கள் கோரப்பட்டபோது அவர் பிறிதொரு கட்சியில் இணைந்து கல்பிட்டி பிரதேச சபைக்கான வேட்பாளராக போட்டியிட அக்கட்சியின் நியமனப் பத்திரத்தில் கையொப்பமிட்டுளளதாக எமது கட்சிக்கு தகவல் கிடைத்தது. தேர்தல் ஆணையகத்தில் அதனை உறுதிப்படுத்திக் கொண்டதன் பின்னர் அவரிடமிருந்து அதற்கான விளக்கமொன்றை பெற்றுக் கொள்ள எமது கட்சி தீர்மானித்து அதற்கான விளக்கத்தினை 14 நாட்களுக்குள்ளாக எமக்கு அனுப்பி வைக்கும்படி கடிதம் அனுப்பப்பட்டது. அதேவேளை அந்த வேட்பாளர் மீண்டும் கட்சி மாறி அகில இலங்கை மக்கள் காங்கிரஸில் இணைத்துக் கொள்ளப்பட்டதாக மற்றொரு தகவலும் கிடைக்கப்பெற்றிருந்தது. 

ஒரே கூட்டணியில் இருந்து கொண்டு தமது கட்சியைச் சாராத அடுத்த நிலையிலுள்ள  வேட்பாளர்களை தன்னிச்சையாக தமது கட்சிக்குள் இணைத்துக் கொள்வதும் அகில இலங்கை மக்கள் காங்கிரஸ் தலைவர் சொல்வதைப்போல புரிந்துணர்வை மீறும் செயல்தான் என்பதை அவர் புரிந்து கொள்ள வேண்டும். 

அவ்வாறு கட்சி மாறிய வேட்பாளருக்கு நாம் அனுப்பியிருந்த விளக்கம் கோரலுக்கான பதில் கடிதத்தில், அவர் கூட்டணியிலுள்ள எந்தக் கட்சியையும் சாராதவர் எனவும் தான் ஒருபோதும் எமது கட்சியில் அங்கத்தராக இணைந்து கொள்ளவில்லை எனவும் கூறியுள்ளதோடு எனவே, அவர் மீது நடவடிக்கை மேற்கொள்ள எமது கட்சிக்கு எந்தவிதமான அதிகாரமும் இல்லை எனவும் குறிப்பிடப்பட்டிருந்தது. அதன் பிரகாரம் அவர் ஒரு பாராளுமன்ற உறுப்பினராக நியமனம் பெறும் பட்சத்தில் எந்தவொரு கட்சிக்கும் கட்டுப்படாத தன்னிச்சையாக செயற்படும் ஒரு உறுப்பினராகவே இருப்பார். ஆகவே, அவ் வேட்பாளருடனும் அவரை எமது கூட்டணிக்குள் இணைப்பதற்கு காரணமாக இருந்த புத்தளம் சிவில் சமூக செயற்பாட்டாளர்களுடனும் கலந்தாலோசித்து அவரை எமது கட்சியின் கட்டுப்பாட்டுக்குள் கொண்டு வரவும் தீர்மானித்திருந்தோம். 

எனவே, எமது கட்சி முகம் கொடுக்கவுள்ள சில பிரச்சினைகளை தீர்த்துக் கொள்ளும் பொருட்டு அலி சப்ரி ரஹீம் எம்.பி. தொடர்பிலான விசாரனைகளின் முடிவினை இரண்டு வாரங்களுக்கு தாமதிக்குமாறும் அகில இலங்கை மக்கள் காங்கிரஸின் தலைவரிடம் கேட்டுக் கொள்ளப்பட்டது. எமது வேண்டுகோளை புறந்தள்ளிவிட்டு அடுத்த நாளே அவரை கட்சியிலிருந்து விளக்கும் தீர்மானத்தினை நிறைவேற்றி, ஒரு முக்கிய அலுவல் காரணமாக கொழும்புக்கு வெளியில் சென்றிருந்த என்னை உடனடியாக கொழும்புக்கு அழைத்து கடந்த நவம்பர் 5ம் திகதி இரவு அக்கடிதம் என்னிடம் கையளிக்கப்பட்டது. அக்கடிதத்தின் பிரதி அலி சப்ரி ரஹீம் ரஹீம் எம்.பி.க்கு அனுப்பப்பட்டதாகவம் கூறப்பட்டதோடு அவரை பாராளுமன்ற பதவியில் இருந்து நீக்குவதற்கான எமது கடிதத்தை உடனடியாகவே அகில இலங்கை மக்கள் காங்கிரஸிடம் ஒப்படைக்குமாறும் வலியுறுத்தப்பட்டது. 

ஒரு கட்சியின் செயலாளர் என்ற வகையில் எனது கட்சியின் உயர்பீட உறுப்பினர்களது அங்கீகாரத்தை பெற வேண்டியுள்ளதன் அவசியத்தை அவர்களுக்கு தெளிவுபடுத்திய போதும் அதற்கு அவர்கள் உடன்படவில்லை. ஏற்கனவே கட்சியின் உயர்பீடம் மூலம் தீர்க்கப்பட வேண்டிய பிரச்சினைகளும்  இருக்கின்ற போது நான் தனியாளாக எந்தத் தீர்மானத்தையும் மேற்கொள்ள முடியாத நிலையிலிருந்தேன். எனவே அதற்கான கால அவகாசம் எனக்கு வழங்கப்பட வேண்டும் என அறிவித்து விட்டு வந்தேன். என்றாலும் அவர்களோ தமது கட்சிக்கு புதிதாக சேர்த்துக் கொள்ளப்பட்ட வேட்பாளரை தம்முடன் தக்கவைத்துக் கொள்வதிலேயே குறியாக இருந்ததாக ஊகிக்க முடிந்தது. எமது வேண்டுகோளுக்கிணங்க கால அவகாசம் வழங்குவதை அவர்கள் வேண்டுமென்றே தவிர்த்துக் கொண்டதாகவே நாம் கருதுகிறோம். 

அதே தினம் அகில இலங்கை மக்கள் காங்கிரஸ் மூலம் தமது தீர்மானம் ஊடகங்களுக்கும் பகிரங்கப் படுத்தப்பட்டிருந்தது. பல்வேறு ஊடகங்களும் என்னைத் தொடர்பு கொண்டு மேற்படி ஒழுக்காற்று நடவடிக்கை தொடர்பில் எனது கருத்தை அறிய முற்பட்டன. இரண்டு கட்சிகளுக்கு இடையே ஏற்பட்ட உள்ளக முரண்பாட்டை சந்திக்கு கொண்டு வந்து அதன் மூலம் அகில இலங்கை மக்கள் காங்கிரஸ் தலைவரையோ ஏனைய அங்கத்தவர்களையோ விமர்சிப்பதை நான் நாகரீகமாக கருதவில்லை. எனவே நான் அலைபேசி அழைப்புகளுக்கு பதிலளிப்பதை சில நாட்களாக தவிர்த்து வந்தேன். 

இதற்கிடையில்தான் அகில இலங்கை மக்கள் காங்கிரஸின் இந்த தீர்மானத்தை நடைமுறைப்படுத்துவதற்கு எதிராக கொழும்பு மாவட்ட நீதிமன்றத்தில் கடந்த திங்கட்கிழமை (13) அலி சப்ரி ரஹீம் எம்.பி. யினால் இடைக்கால தடை உத்தரவு பெறப்பட்டுள்ளதாக எனக்கு அறிவிக்கப்பட்டது. 

நேற்று முன்தினம் (15) என்னை தொடர்பு கொண்ட அகில இலங்கை மக்கள் காங்கிரஸின் பிரதி செயலாளர் நாயகம் இந்த வழங்கு விடயத்தில் நாம் அவர்களது கட்சிக்கு ஒத்துழைப்பு வழங்க வேண்டும் என்று கேட்டுக் கொண்டார். அது விடயமாக எமது ஒத்துழைப்பை வழங்க நாம் தயாராக உள்ளதாகவும், நேற்று காலை (16) நாம் சந்தித்து அது பற்றி கதைப்போம் எனவும் உறுதியளித்திருந்தேன். அதனை அவரது கட்சித் தலைவருக்கு எத்தி வைத்ததாகவும் அவர் எனக்கு தெரிவித்தார்.  

இவ்வாறான தொலைபேசி உரையாடல்கள் நடந்தும் நேரில் சந்திப்பதற்கான காலமும் குறிக்கப்பட்டிருந்த நிலையிலும் நேற்றைய தினம் மாலைவரை நான் தொலைபேசிக்கு பதிலளிக்காது தவிர்ந்து வருவதாகவும் அதன்மூலம்  அலி சப்ரி ரஹீம் எம்.பி. மாவட்ட நீதிமன்றம் செல்வதற்காக நான் உதவி செய்ததாகவும் என்மீது குற்றம் சாட்டப்பட்டுள்ளது. 

தான் செய்த தகடுதத்தங்களை மறைப்பதிலும் கூட சிறு பிள்ளளைதனமாக அரசியல் ஆதாயம் தேடுகின்ற முயற்சியாகவே நான் இதனை கருதுகிறேன். ஒழுக்காற்று நடவடிக்கைகள் சம்பந்தமான வழக்குகளில் அகில இலங்கை மக்கள் காங்கிரஸுக்கு ஒத்துழைப்பு வழங்குவதாக அறிவிக்கப்பட்ட நிலையிலும் அவர் இவ்வாறு நடந்து கொள்வதையிட்டு வருந்துகிறேன். 

அடுத்த கட்சிகளிலிருந்து உறுப்பினர்களை காவுகொண்டு தனது கட்சியை வளர்க்கும் முயற்சியையும் கட்சிகளுக்கு இடையிலான சில்லறை பிரச்சினைகளை பாரியதொரு சமூகப் பிரச்சினையாக மக்கள் மயப்படுத்த முனையும் வழமையையும் இனியாவது அவர் தவிர்ந்து கொள்வதே நல்லது. 

மஸீஹுதீன் நயீமுல்லாஹ் 

செயலாளர் நாயகம் 

ஐக்கிய தேசிய கூட்டமைப்பு